20:45, 21 Шілде 2017 | GMT +6
Әлеуметтік желіде балағат сөздер жазған Атырау облысының тұрғыны тұтқындалды
АТЫРАУ. ҚазАқпарат - Әлеуметтік желідегі балағат сөздер үшін Атырау облысының тұрғыны төрт тәулікке тұтқындалды, деп хабарлады «ҚазАқпарат» ХАА тілшісі.
Атырау облысы Исатай аудандық соты ҚР ӘҚтК 434-бабы 1-бөлігіне қатысты әкімшілік істі қарады.
Материал деректері бойынша, С. Атты азамат жол-көлік оқиғасы туралы облыстың ІІД хабарламасына балағат сөздермен пікірін қалдырған. Апат 2017 жылы маусымда Атырау-Астрахань тасжолында болған. Бұл туралы хабарлама ІІД «Facebookтегі» жеке парақшасында жарияланған.
«Сот отырысында азамат С. өз ісіне өкінді. Сот қаулысымен ол айыпты деп танылып, оған 4 тәулікке әкімшілік тұтқындау түрінде жаза тағайындалды», - деп хабарлады Исатай аудандық сотының баспасөз қызметі.
Қаулы заңды күшіне енген жоқ.