Ақмола облысында тасқын суға батқан жолаушылар автобусынан 15 жолаушы құтқарылды
ТЖД мəліметі бойынша жайсыз жағдай бүгін сағат 17:10-дар шамасында Максимовка ауылының маңында, яғни «Көкшетау-Атбасар» тасжолының 118 шақырымында болған.
«Атбасар қаласына бағыт алған «Паз» автобусы су шайып кеткен жолмен өтпек болып, жол шетіндегі орға түсіп кеткен. Сол кезде автобус ішінде 15 жолаушы отырған. Оның 10-ы балалар. Абырой болғанда ешкім зардап шеккен жоқ. Оқиға орнынан табылған құтқарушылар жолаушылардың барлығын суға батқан автобустан дереу аман алып шықты. Жолаушыларлың барлығы Максимовка орта мектебіне орналастырылды», - деп түсіндірді ТЖД қызметкерлері.
Еске сала кетейік, бүгін таңертең Сандықтау ауданында су тасқыны орын алып, 65 тұрғын үйді су басты. Оның ішінде 50-і Сандықтау ауылында болса, 15-і Балкашин селосындағы үйлер. Осының салдарынан 180-ге жуық адам қауіпсіз жерге көшірілген болатын. Қазіргі кезде ауданда жағдай тұрақты.