АСТАНА. Қыркүйектің 3-і. ҚазАқпарат /Дамир Байманов/ - Мемлекет басшысы Нұрсұлтан Назарбаев жұма, қыркүйектің 3-і күні «Изумрудный квартал» кешенін аралай отырып, Астанада салынуы жоспарланып отырған жаңа нысандар туралы айтты.

«Бұл жерде Оқушылар сарайы салынатын болады. Өнер университеті жанынан 5 мың орынға арналған жаңа университет ғимараты бой көтереді. Тәуелсіздік сарайының оң жағында Қазақстан Тарихының мұражайы орналасады. «ҚазМұнайГаз» ғимаратының артынан жаңа Опера және балет театрының қабырғасы қаланады», - деді Н.Назарбаев.

Бұрынырақ Мемлекет басшысы сулы-жасыл желекте елдің ірі телекомпаниялары орналасатын медиа-орталықтың ашылатындығы туралы хабарлаған болатын. «Бұл фильмдер түсіріп, қоғамдық іс-шаралар өткізуге арналған заманауи студиялармен жабдықталған жаңа медиа-кешен болады», - деп атап өтті Елбасы.

Мемлекет басшысы келесі жылы үлескерлердің барлық мәселесі шешімін табатындығын жеткізді. Президент жалға берілетін үй қазақстандықтарды тұрғын үймен қаматамасыз етудің жақсы шешімі екендігін, сонымен қатар төлеп отырған жалдау қаражаты сол пәтерді сатып алуға есептеліп отыратындығын атап көрсетті.