اقتوبەلىكتەر كوپ جاعدايدا تىستەپ العان ءيت پەن مىسىقتى ورتەپ جىبەرەدى

None
None
اقتوبە. قازاقپارات - اقتوبەلىك ۆەتەرينارلار تىستەپ، تىرناپ العان ءيت پەن مىسىقتى، اۋىرعان مالدى دەر كەزىندە ۆەتەرينارلارعا تاپسىرۋدى سۇرايدى. سوڭعى جىلدارى قۇتىرما اۋرۋىنىڭ بەلگىسى بار مال مەن جانۋاردى ورتەپ، جويىپ جىبەرۋ ادەتكە اينالعان، دەپ حابارلايدى قازاقپارات ءتىلشىسى.

اقتوبە وبلىسىندا بيىل 471 ادام جان- جانۋار مەن مالدان زارداپ شەگىپ، دارىگەرلەرگە جۇگىندى. ولاردى ءيت پەن مىسىق تىستەپ، تىرناپ العان. ءىرى قارا مال مەن جىلقى تىستەگەندەرى دە بار. تۇلكىدەن زارداپ شەككەن ادام وقيعاسى دا تىركەلدى. بيىل الدىن الۋ شاراسىنا، اتۋ جۇمىستارىنا بارلىعى 52 ميلليون تەڭگەگە جۋىق قارجى بولىنگەن. ناتيجەسىندە 7 مىڭنان استام ءيت پەن 300-دەن استام مىسىق جويىلدى.

«ءيت تىستەپ، تىرناپ العان سوڭ ادامدار قورقىپ، «ماعان شارا قولدانادى» دەپ ويلاپ، ءبارىن جاسىرىپ قالادى. ورتەپ، كومىپ تاستايدى. قۇتىرما اۋرۋى بار ما، جوق پا دەگەن سۇراقتىڭ جاۋابى تابىلماعان سوڭ يەسى ۆاكسينانى تولىق الادى. بۇل دۇرىس ەمەس. حالىقتى اقپاراتتاندىرۋ كەزىندە تىستەگەن، تىرناعان جانۋاردان سىناما الۋ ماڭىزدى ەكەنىن ءتۇسىندىرۋ كەرەك. ماسەلەن، بايعانين اۋدانىنىڭ تۇرعىنى مال دارىگەرىن كۇتپەي مالدى سويىپ، ورتەپ جىبەرگەن. زەرتتەۋ جۇرگىزگەن كەزدە مالدان قۇتىرما اۋرۋى انىقتالمادى. بۇل دا شىعىن»، - دەدى اقتوبە وبلىستىق قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى مۇحتار سەربايەۆ.

 ۆەتەرينار دارىگەرلەر، زەرتحانا ماماندارى دا تىستەپ، تىرناپ العان جان- جانۋار باسى جەتپەي جاتاتىن جاعدايلار تىركەلەتىنىن جاسىرمادى. كەيبىرى بيوماتەريالدى ءشىرىتىپ جىبەرەدى.

«زەرتتەۋگە قاجەتتى ماتەريالدىڭ كوبى جارامسىز بولىپ كەلەدى. بارلىق اۋداندا مۇنداي جاعداي بار. ادامدار ورتەپ، ءشىرىتىپ جىبەرەدى. ءيت پەن مىسىق بولسا تۇگەل جەتكىزىپ، ءىرى قارا بولسا مالدىڭ باسىن اكەلۋ شارت. ءبىز ميعا زەرتتەۋ جاساپ، قۇتىرما اۋرۋىن انىقتايمىز»، - دەدى رەسپۋبليكالىق ۆەتەريناريا زەرتحاناسىنىڭ وبلىستىق فيليالى ديرەكتورىنىڭ ورىنباسارى گۇلسىم نايمانوۆا.

 ايتا كەتەيىك، اقتوبە وبلىسىنىڭ ىرعىز، شالقار، قوبدا اۋداندارىندا قۇتىرما اۋرۋى انىقتالىپ، شەكتەۋ قويىلعان بولاتىن. قازىر ىرعىز اۋدانىنداعى شەكتەۋ ءالى بار.

اۆتور: التىناي ساعىندىقوۆا

سوڭعى جاڭالىقتار