ءبىر ءتۇرلى ۇيلەر

None
None
 استانا. قازاقپارات - ارحيتەكتۋرا - ناعىز ونەر، ول كەز كەلگەن كىسىنىڭ كوزىن جاۋلاپ، كوڭىلىن باۋراپ الادى.

كوپتەگەن ەلدىڭ استانالارى مەن ءىرى قالالارى تۇگىلى، شاعىن قالاشىقتارى دا ساۋلەت ونەرىنىڭ سالتاناتىنا بولەنىپ، ميلليونداعان تۋريستەردى تامساندىرىپ، امالسىزدان ساپارعا شىعۋعا ماجبۇرلەۋدە. وسىندايدا ويعا جۇيرىك، قيالى شەكسىز، شەبەرلىكتىڭ شىڭىن باعىندىرعان ساۋلەتشىلەر تاريحي ورىنداردى جاڭارتىپ، جاساندىرىپ جاتىر. ەشقانداي ستاندارتتارعا باعىنبايتىن، ءوز الدىنا جەكە الەمگە اينالعان جەرلەردەگى ۇيلەر جۇرتتى ەرىكسىز جولعا شىعارادى. ايتالىق، تۇركيادا كاداكوپيا دەپ اتالاتىن جەراستى ۇيلەرى قوناق كۇتۋدەن جىل ون ەكى اي جالىقپاي كەلەدى. ءبىر قاراعاندا ۇرەي بيلەگەن ۇيلەر اراسىندا تۇندە ءجۇرۋ -  قورقىنىشتى.

وسى سەكىلدى تاڭعالارلىق تۇرعىن ۇيلەر الەمنىڭ ءار شالعايىندا كوپتەپ ۇشىراسادى. ءبىر قىزىعى، ەلدى اۋزىنا قاراتۋ ءۇشىن قىزىق تا توسىن ۇيلەردى جەكەلەگەن ادامدار سالۋدى ادەتكە اينالدىرعان. ەشكىمنىڭ باسىنا كەلمەگەن قۇرىلىستاردىڭ ءبىرى قيال الەمىنە جەتەلەسە، ەندى ءبىرى كۇلكىڭدى كەلتىرەدى. توسىننان تۇرعىزىلعان ۇيلەر تۋرالى مىنا دەرەكتەردى وقي وتىرىڭىز.

گەومەتريالىق شوۋ (ا ق ش، بوۋلدەر)

  دجۋدي لەستا - كونە جيھازدار سالونىنىڭ يەسى. ول ەشكىمنىڭ ويىنا كەلمەگەن باسپانادا تۇرادى. ءۇيدىڭ قابىرعاسى دا، شاتىرى دا جوق. 16 ءۇشبۇرىشتان تۇراتىن باسپانا بۇكىل الەمنىڭ ەشبىر جەرىندە كەزدەسپەيدى. بۇل قۇرىلىس 1958 -جىلى ارحيتەكتور حارتلينگ جاساعان عاجايىپتاردىڭ ءبىرى.

 ءمولدىر ءۇي (انگليا، لوندون)

  قۇپيا مەن جۇمباق -  ادامداردى ۇنەمى مازالايتىن قۇبىلىستار. كونە ەسكەرتكىشتەرمەن قورشالعان بۇل باسپانا دا ادامداردى بەي- جاي قالدىرمايدى. سوعان قاراماستان زاماناۋي كورىنەدى. حايگەيت زيراتتارىندا سالىنعان ءۇي قازىرگى يەسىنە مۇراگەرلىككە قالعان. ءبىر جاقسى جەرى «كورشىلەرى» ەشۋاقىتتا شۋلاپ، جىل ون ەكى اي مازالامايدى.

 كوبىك ءۇي (فرانسيا، تەۋل- سيۋر- مەر)

  بۇل باسپانانىڭ قۇنى -  450 ميلليون دوللار. «كوبىكتەر سارايى» اتاۋىنا يە ارحيتەكتۋرالىق قۇرىلىس كوكشىل جاعالاۋدىڭ كوركىن كىرگىزىپ تۇر. اۆتورى -  لوۆاگا، پەر كاردەننىڭ وسى كۇنگە دەيىنگى قوجايىنى. لوۆاگا بۇرىشتاردى ۇناتپايتىن ادام. سوندىقتان بۇرىشتىڭ ءوزىن تولقىنعا اينالدىرۋعا تىرىسقان. ناتيجەسىندە، كوبىك ءۇي ومىرگە كەلەدى. وسىلايشا، توعىز شار توعىز بولمەگە اينالىپ شىعا كەلگەن.

 سالەمدەسەتىن ءۇي (اۆستراليا، مەلبۋرن)

  HELLO -  قوناقتارىن قارسى الۋدان شارشاماعان ءۇيدى سالۋ يدەياسى روزە نولانانىڭ عانا باسىنا كەلگەن سىڭايلى. كونە ءۇيدى قايتا جاڭعىرتۋعا كىرىسكەندە، ونى قازىرگى زامانعا لايىقتاۋدى دا ۇمىتپاپتى. كوشەدەن وتكەن كىسىنىڭ كوڭىل- كۇيىن كوتەرەتىن باسپاناعا كورشىلەرى قاتتى قىزىعادى ەكەن.

 جەراستى ۆيللاسى (شۆەيتساريا، ۆالس)

  ۆالس -  شۆەيتسارياداعى كونە دەريەۆنيا. ال ۆيللاڭىز جەراستىندا ورنالاسقان. مۇندا ءار بولمەنىڭ ءوز تەرەزەسى جانە كوشەگە شىعاتىن ەسىكتەرى بار. بۇل وسىنداعى وتە قوناقجاي ءۇي بولىپ سانالادى. مۇندا كەلگەن تۋريستەر اپتاسىنا 2,1-2,8 مىڭ ەۋرو تولەپ، قالاعانىنشا تىنىعا الادى.

 ۇشاق قاناتىنداعى ءۇي (ا ق ش، ماليبۋ)

  Boeing 747 ۇشاعىنىڭ قاناتى پايدالانىلعان بۇل ءۇي دە كورگەن كىسىنى قىزىقتىرادى. ەسكى ۇشاقتىڭ قاناتتارىن اشەكەي رەتىندە پايدالانۋ ءۇشىن ونى ءۇي قوجايىنى 50 مىڭ دوللارعا ساتىپ العان. كولەمى 230 شارشى مەتردى قۇرايتىن قاناتتار وسىندا تىكۇشاقپەن جەتكىزىلگەن. قۇلاعان ۇشاقپەن شاتاستىرماۋ ءۇشىن ءۇي فەدەرالدى ازاماتتىق اۆياتسيا باسقارماسىندا تىركەلگەن.

 ماسكەۋ ماڭىنداعى شار ءۇي (رەسەي، زەلەنوگراد)

  رەسەي ارحيتەكتۋرالىق عاجايىپتارعا تولى ەلدەردىڭ قاتارىنا جاتادى. ماسەلەن، ماسكەۋ ماڭىنداعى شار ءۇيدىڭ يەسى -  ولگا كوچۋنيەۆا. قۇپيا كۇمبەزدىڭ جوعارعى جاعى جاپىراق ىسپەتتەس ماتەريالمەن جابىلعان. ونى ولگا «اناناس ءۇي» دەپ تە اتايدى. ال ىشكى قابىرعالارى قاراعاي تاقتايلارمەن ارلەنگەن. تىنىشتىقتى قالاعان ارۋ اقىرى شەتكەرىرەك جەردەن وسىنداي باسپانا سالىپ، ءتىپتى تەلەديداردى دا پايدالانباي عۇمىر كەشىپ كەلەدى.

 جولداسبەك دۋاناباي

«ايقىن»

سوڭعى جاڭالىقتار