يران مەن تۇركى حالىقتارىنىڭ تاريحي بايلانىسى جايلى تىڭ كىتاپ وقىرمانعا جول تارتتى

«دەشتى قىپشاق دەگەندە ءبىز Ⅺ عاسىردا ناسير حۋسراۆي «دەشتى قىپشاق» دەپ اتاپ كەتكەن، اسا ۇلكەن اۋماقتى يەلەنگەن تۇركى حالىقتارى تۋرالى ايتامىز. بۇل اتاۋ گەورافيالىق جانە تاريحي تۇرعىدا وتە تانىمال تەرمين. ءبىز مىنەكەي، سەگىزىنشى رەت قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ شىعىس تانۋ ينستيتۋتىمەن بىرلەسە وتىرىپ، يران عىلىمي مەكەمەسىنىڭ كومەگىمەن «يران مەن ورتالىق ازيا حالىقتارىنىڭ رۋحاني ءارى تاريحي بايلانىسى» اتتى حالىقارالىق كونفەرەنسيا وتكىزىپ وتىرمىز. كونفەرەنسياعا قازاقستاندىق جانە يراندىق، ورتالىق ازيا جانە رەسەيدەن كەلگەن عالىمدار قاتىسۋدا. بۇل ورىس تىلىندە شىعىپ وتىرعان كىتاپتىڭ سوڭعى تومى. وعان بەلگىلى عالىمداردىڭ، اتاپ ايتقاندا سانكت- پەتەربۋرگتەگى شىعىس تانۋ ينستيتۋتىنىڭ اكادەميگى الي كولەسنيكوۆتىڭ ەڭبەگى ەنگىزىلىپ وتىر»، - دەدى قازاقستاندىق شىعىستانۋشى، ادەبيەتشى، جازۋشى سابير ابدۋللو كىتاپتى تانىستىرا وتىرىپ.

ونىڭ ايتۋىنشا، الي كولەسنيكوۆتىڭ VII عاسىردا ورتالىق ازيا مەن يراندا ءومىر سۇرگەن حريستياندار تۋرالى ەڭبەگى جيناقتى تولىقتىرعان. سونىمەن بىرگە، كىتاپقا لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ پروفەسسورى رۋستام شۋكۋروۆتىڭ جازعان جازبالارى، قازاقستاندىق عالىم ادىلەت كامالوۆتىڭ سوعدىلار مەن تۇركىلەردىڭ بايلانىسى تۋرالى ەڭبەكتەرى كىرگىزىلگەن.

سابير ابدۋللو سونىمەن بىرگە، تۇساۋكەسەر بارىسىندا تەگەران ۋنيۆەرسيتەتىنىڭ پروفەسسورى احماد حاتاميدىڭ فيلولوگيا عىلىمدارىنىڭ كانديداتى ايناش سەيتوۆانىڭ ءتارجىماسىنداعى «قازىرگى يران ادەبيەتى» (قازاق تىلىندە) اتتى كىتابىن تانىستىردى.

اۆتور: ايان بەكەن ۇلى