15:47, 25 - ءساۋىر 2018 | GMT +6
گەرمانيا مەن فرانسيا بىرىگىپ جاڭا جويعىش ۇشاق جاساپ شىعارماق
بريۋسسەل. قازاقپارات - گەرمانيا مەن فرانسيا بىرىگىپ Eurofighter Typhoon جانە Rafale جاۋىنگەرلىك ۇشاقتارىنىڭ ورنىن باساتىن جاڭا جويعىش ۇشاقتارعا قاجەت نەگىزگى تالاپتاردى ماقۇلدادى.
بۇل تۋرالى «قازاقپارات» ح ا ا- ءنىڭ مەنشىكتى ءتىلشىسى Euractiv جۋرنالىنا سىلتەمە جاساپ حابارلايدى.
سارسەنبى كۇنى ەكى ەلدىڭ رەسمي تۇلعالارى بەرليندەگى ILA Berlin Air Show اۆياسالونىندا ارنايى قۇجاتقا قول قويادى. بۇل تۋرالى وتكەن جىلدىڭ شىلدە ايىندا گەرمانيا كانسلەرى انگەلا مەركەل مەن فرانسيا پرەزيدەنتى ەممانۋەل ماكرون ايتقان بولاتىن.
جاڭا ۇشاق وزدىگىنەن نەمەسە جەردەن باسقارىلاتىن قاسيەتتەرىنەن باسقا شابۋىل جانە قورعانىس وپەراتسيالارىن جۇزەگە اسىرا الادى.
جويعىش ۇشاقتى جاساۋداعى باستى ماقسات - ءۇش باسكەلەس باعدارلاما، ياعني Rafale مەن Eurofighter شۆەدتىڭ Gripen كومپانيالارىنىڭ باسىن بىرىكتىرۋگە قادام جاساۋ.
سونىمەن قاتار گەرمانيا مەن فرانسيا تەڭىز ءۇستىن باقىلايتىن جاڭا ۇشاقتىڭ جاباسىن دايىنداۋ بويىنشا كەلىسىمگە قول قويماق.