كەنجەبەك مەيرامبەك بەسبايەۆتىڭ دومبىراسىن نە سەبەپتى كوتەرىپ جۇرەتىنىن ءتۇسىندىردى

ول ءوزىن ونەر كوشىنە ىلەستىرگەن اعالارىنىڭ الدىندا ماڭگى قارىزدار ەكەنىن بىلەدى. ولاردان ەشقاشان اسىپ تۇسپەيدى نەمەسە جولىن كەسپەيدى. ءتىپتى، جۇرگەن جەرىندە مەيرامبەك بەسبايەۆتىڭ دومبىراسىن كوتەرىپ جۇرەدى ەكەن.

بۇل تۋرالى كەنجەبەك Hit-TV ارناسىنىڭ «كەزدەر-اي» باعدارلاماسىندا ايتتى.

«مەيرامبەك اعامىزدىڭ دومبىراسىن كەز كەلگەن جەردە ۇستاپ جۇرەمىن. اۋەجايدا، باسقا جەردە بولسىن. سوندا ادامدار: «نەگە ۇستاپ جۇرەسىڭ؟ الدە قورىققاندىقتان با؟ قازىر «مۋزارتقا» ەڭبەگى سىڭگەن ازاماتسىڭ عوي» دەپ جاتادى. ەندى 13 جىل دەگەن دە وڭاي ەمەس. مەن ايتامىن، نەگە ۇستاماسقا؟ سول دومبىرانى ۇستاۋدى ارمانداپ جۇرگەن قانشاما ونەرپازدار بار؟! ودان مەنىڭ دارەجەم ءتۇسىپ قالمايدى، نە بولماسا كىشىرەيىپ قالمايمىن. كەرىسىنشە كوتەرىلمەسە؟! قازىر، شىنى كەرەك، ۇشەۋمىزدىڭ دە دارەجەمىز بىردەي دەپ ويلايمىن.

بارعان جەرىمىزدە جوعارىعا شىعىڭىزدار دەپ جاتادى. ءبىراق قانشالىقتى جوعارىعا شىعارىپ جاتسا دا، مەنىڭ ءبىر ادەتىم، تومەندە وتىرامىن. ول كىسىلەر دە كىشىپەيىلدىلىكتى جاقسى بىلەدى. ءبىراق قوناق بوپ بارعان سوڭ جوعارىعا شىعاراتىنىن بىلەدى دە، بىردەن شىعىپ كەتەدى. مەن تومەندە وتىرا بەرەمىن. وزىمە سول ىڭعايلى. كەيىنگى كەزدە دوستارىمنىڭ ۇيىنە بولسىن قوناققا بارعاندا، قۇرمەتى باسقا ەكەنى سەزىلەدى. ءوزىم دە ءبىرتۇرلى بولىپ قالامىن، مەن وسىنداي دارەجەگە جەتىپ قالدىم با دەگەن سياقتى»، - دەيدى كەنجەبەك اعىنان جارىلىپ.

ءجانابىلوۆ توپقا كەلگەنىنە 14 جىلعا جۋىقتاسا دا، ءالى كۇنگە دەيىن ەڭ العاش كەلگەن كەزدەگىدەي سەزىنەتىنىن ايتادى. الايدا بۇگىندە ەسەيگەن، تاجىريبە جيناقتاعان كەنجەبەك توپتاعى اعالارىنا جۇمىسقا قاتىستى ءوز پىكىرىن اشىق ايتادى ەكەن.

«كيىمگە، انگە كەلگەن كەزدە ارينە مەن دە ءوز پىكىرىمدى ايتىپ وتىرامىن. ءان ۇناماسا بولماسا كيىمگە بىردەڭە قوسۋ كەرەك بولسا، ءوز ويىمدى بىلدىرەمىن. تەك ەكەۋىنىڭ عانا اڭگىمەسى جۇرە بەرمەيدى عوي. مەنىڭ دە كەلگەنىمە 14 جىل بولدى. بىرلىك بار جەردە تىرلىك بار دەگەن ءسوز بەكەر ايتىلماعان عوي. سەن انانى بىلاي ىستە، مىنانى بىلاي ىستە دەمەيدى. ولار دا مەنىڭ قاس-قاباعىما قارايدى دەپ ويلايمىن»، - دەيدى كەنجەبەك.