تۇركيادا دينا نۇرپەيىسوۆاعا ەسكەرتكىش ورناتىلادى

بۇل جوباعا اتىراۋ وبلىسىنىڭ بيزنەس قۇرىلىمدارىنىڭ وكىلدەرى قولداۋ ءبىلدىردى. تانىمال قازاق كومپوزيتورىنىڭ ەسكەرتكىشىن ورناتۋعا 15 ميلليون تەڭگە جۇمسالاتىن بولادى.

مۇسىندىك كومپوزيتسيا قازاقستان رەسپۋبليكاسى تاۋەلسىزدىگىنىڭ 20 جىلدىعىن تۇركيادا مەرەكەلەۋ اياسىندا 2011-جىلى انكارادا اشىلعان دينا نۇرپەيىسوۆا اتىنداعى ساياباقتا ورناتىلادى. سول جىلى تۇركيادا اتاقتى قازاق كومپوزيتورى دينا نۇرپەيىسوۆانىڭ 150 جىلدىق مەرەيتويى كەڭىنەن اتاپ وتىلگەن بولاتىن.

«قازاقستاننىڭ مەملەكەت باسشىسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا رۋحاني جانە مادەني قۇندىلىقتاردى ساقتاۋعا جانە مولايتۋعا ەرەكشە كوڭىل بولىنگەنىن اتاپ وتكىم كەلەدى، - دەدى نۇرلان نوعايەۆ. - «جاھانداعى زاماناۋي قازاقستاندىق مادەنيەت» جوباسى اياسىندا قازىرگى تاڭدا قازاق مادەنيەتىنىڭ ۇزدىك تۋىندىلارىمەن الەم جۇرتشىلىعىن تانىستىرۋ ءۇشىن جاعدايلار جاسالۋدا. بۇل وتاندىق شىعارماشىلىق زيالى قاۋىم ءۇشىن ۇلكەن مۇمكىندىكتەرگە جول اشادى.

قازاقستان ەلشىلىگىنىڭ، تۇركيانىڭ مادەنيەت جانە تۋريزم مينيسترلىگىنىڭ، تۇرىك مادەنيەتى حالىقارالىق ۇيىمىنىڭ (تيۋركسوي) جانە انكارا قالاسى ەتيمەسگۋت اۋدانى مەرىنىڭ ۇيىمداستىرۋىمەن 2011-جىلى دينا نۇرپەيىسوۆا اتىنداعى ساياباق اشىلعانىن ەستەرىڭىزگە سالامىز. بۇل تانىمال كۇيشىنىڭ اتىنداعى شەتەلدە اشىلعان العاشقى ساياباق.

اتاقتى قازاق كومپوزيتورى دينا نۇرپەيىسوۆا - تەك قازاق حالقىنىڭ ەمەس، بۇكىل تۇرىك جۇرتشىلىعىنىڭ ىقىلاسى مەن قۇرمەتىنە بولەنگەن العاشقى ايەل.