قازاقستان باسپا ءسوز ەركىندىگى يندەكسىندە ءبىر ورىن تومەندەدى

RWB الەمدەگى 2017-جىلدىڭ قورىتىندىسى بويىنشا باسپا ءسوز ەركىندىگى جونىندەگى ەسەبىندە قازاقستاننىڭ ساتى - 157-ورىننان 158-ورىنعا كوتەرىلگەنىن ايتادى.

ۇيىم باسپا ءسوز ەركىندىگىن شەكتەۋ قازىر بۇرىنعىداي اۆتوريتارلىق رەجيمدەر مەن ديكتاتورلار عانا جاسايتىن ءىس بولماي بارا جاتقانىنا الاڭدايدى.

25- ساۋىردە جاريالاعان ەسەبىندە RWB باسپا ءسوز ەركىندىگىنە قول سۇعۋشىلىق يندەكستە جىل سايىن بارىنشا ايقىن كورىنە باستاعانىن ايتادى. ۇيىم مىسال رەتىندە بيىلعى يندەكستە ا ق ش پەن ەۋروپانىڭ بىرنەشە ەلىنىڭ كورسەتكىشى ناشارلاعانىن كەلتىرەدى.

«ساياسي ليدەرلەردىڭ باسپا ءسوز ەركىندىگىنە جاۋلىعى تۇركيا (157-ورىن) جانە ەگيپەت (161-ورىن) سياقتى اۆتوريتارلىق ەلدەرمەن عانا شەكتەلمەيدى. دەموكراتيالىق جولمەن سايلانعان ليدەرلەر قازىر باسپا سوزگە دەموكراتيانىڭ اجىراعىسىز قۇرالى رەتىندە ەمەس، قارسىلاس رەتىندە قاراپ، وعان دەگەن جاۋلىق كوزقاراسىن اشىق بىلدىرە باستادى» دەلىنگەن ەسەپتە.

RWB يندەكسىندە العاشقى ورىنداردا نورۆەگيا مەن شۆەتسيا، سوڭعى ورىندا سولتۇستىك كورەيا تۇر.

بيىلعى يندەكستە پوستسوۆەتتىك ەلدەردەن گرۋزيا 61- ورىندا، ارمەنيا 80-ورىندا، مولدوۆا 81-ورىندا، ۋكراينا 101-ورىندا، رەسەي 149-ورىندا، تاجىكستان 149-ورىندا، بەلارۋس 155-ورىندا، ازەربايجان 163-ورىندا، وزبەكستان 165-ورىندا، تۇركىمەنستان 178-ورىندا تۇر. قىرعىزستان بىلتىرعىدان توعىز ورىن تومەندەپ، 98-ورىنعا تۇسكەن.

2002-جىلدان بەرى جاريالاناتىن يندەكسكە 180 مەملەكەت ەنگىزىلگەن. يندەكستە مەملەكەتتەردىڭ پليۋراليزم، باق پەن زاڭناما تاۋەلسىزدىگى جانە جۋرناليستەردىڭ قورعالۋ كورسەتكىشتەرى قامتىلعان.