قازاقستان مەن قىتاي سىرتقى ىستەر مينيسترلەرى ەلباسىنىڭ ساپارىنا دايىندىق ماسەلەسىن تالقىلادى

كەزدەسۋ بارىسىندا ەكى ەلدىڭ سىرتقى ىستەر مينيسترلەرى قازاقستان-قىتاي قارىم-قاتىناسىنىڭ اۋقىمدى ماسەلەلەرىن تالقىلادى. اسىرەسە، قازاقستان پرەزيدەنتى نۇرسۇلتان نازاربايەۆتىڭ قىتايعا ساپارىنا جانە شاڭحاي ىنتىماقتاستىق ۇيىمىنىڭ سامميتىنە قاتىسۋىنا دايىندىق ماسەلەسىنە اسا ءمان بەرىلدى.

قوس تاراپ ەكى ەلدىڭ ازاماتتارىنىڭ قۇقىعىن قورعاۋ، ترانس شەكارالىق وزەندەردى بىرلەسە پايدالانۋ سىندى ماسەلەلەردى قارادى. جۋىق ارادا كونسۋلدىق قىزمەتتەر جەلىسى ارقىلى سىرتقى ىستەر مينيسترلىكتەرى اراسىندا كونسۋلتاتسيالار وتكىزۋ تۋرالى كەلىسىم جاسالدى.

ق. ءابدىراحمانوۆ قازاقستان تاراپى «نۇرلى جول» مەن «ءبىر بەلدەۋ، ءبىر جول» باعدارلامالارىن توعىستىرۋ باعىتىندا بەلسەندى جۇمىس جاساي بەرەتىنىن جەتكىزدى. بۇل قىتايدان قازاقستان ارقىلى ەۋروپا مەن تاياۋ شىعىس ەلدەرىنە تاسىمالداناتىن كونتەينەردىڭ كولەمىن ارتتىرۋعا، ەلدىڭ كولىكتىك-ترانزيتتىك الەۋەتىن ارتىرۋعا جول اشپاق.

ەكى جاق الداعى ۋاقىتتا وندىرىستىك قۋاتتى ارتتىراتىن باعدارلامانى ءجىتى جۇزەگە اسىرۋ ماسەلەسىنە قىزىعۋشىلىق تانىتتى. قازىرگى تاڭدا قۇنى 27 ميلليارد دوللار بولاتىن 51 بىرلەسكەن جوبا بويىنشا جۇمىستار جۇرگىزىلىپ جاتىر، ونىڭ 5 ەۋى ىسكە قوسىلعان (قۇنى 158 ميلليون دوللار). سونداي-اق، قىتاي نارىعىنا قازاقستاندىق اۋىل شارۋاشىلىق ونىمدەرىن جەتكىزۋ نومەنكلاتۋراسىن كەڭەيتۋ ماسەلەسى دە زور ماڭىزعا يە.

مينيسترلەر، سونداي-اق، الداعى ۋاقىتتا ينۆەستيتسيا، ەنەرگەتيكا، قارجى، شەكارا ماڭى ساۋداسى، «قورعاس» شەكارا ماڭى ىنتىماقتاستىعى حالىقارالىق ورتالىعى قىزمەتىنىڭ تيىمدىلىگىن ارتتىرۋ سىندى ماسەلەلەردەگى كەلەسى قادامداردى تالقىلادى.