قازاقستان حالقىنىڭ بىرلىگى كۇنىنە وراي شىمكەنتتە فوتو بايقاۋ جاريالاندى

بۇل تۋرالى اكىمدىكتىڭ ينستاگرامداعى پاراقشاسىندا جازىلدى، دەپ حابارلايدى قازاقپارات ءتىلشىسى.

بايقاۋ شارتىنا سايكەس، قاتىسۋشى دوسىمەن نەمەسە كەز كەلگەن وزگە ۇلت وكىلىمەن سۋرەتكە ءتۇسىپ، وزگە ۇلتتىڭ ۇلتتىق كيىمىن كيىپ سەلفي جاساۋى كەرەك.

«ءبىز «اشىق ەل» دەگەن فوتو challenge باستايمىز! قانە، قازاقستان حالقى - بىرلىگى مەن دوستىعى جاراسقان ەل ەكەنىن كورسەتەيىك. دوسىڭىزبەن (تانىس، تۋىسقان، كورشى) كەز كەلگەن وزگە ۇلت وكىلىمەن سۋرەتكە ءتۇسىپ نەمەسە وزگە ۇلتتىڭ ۇلتتىق كيىمىن كيىپ سەلفي جاساڭىز دا پاراقشاڭىزعا #ashyqel/#اشىقەل حەشتەگىمەن جاريالاڭىز. @akimat.shymkent بەلگىلەڭىز. ەڭ تانىمال بولعان 3 سۋرەتكە 10 مىڭ تەڭگە كولەمىندە اقشالاي سىيلىق بار»، - دەلىنگەن اكىمدىكتىڭ پاراقشاسىندا.

ايتا كەتەيىك، بۇعان دەيىن اكىمدىك قىزعالداقتارمەن تۇسكەن سۋرەتتەرگە بايقاۋىن جاريالاعان بولاتىن. وعان قالا تۇرعىندارىنان 500 دەن اسا سۋرەت ءتۇسىپ، ۇزدىك دەپ 20 سۋرەت تانىلعان. كەيىننەن قالا تۇرعىندارى سول ۇزدىكتەر اراسىنان وزدەرىنە ۇناعان سۋرەتتى بەلگىلەپ، پىكىرلەرىن قالدىردى. وسىلايشا 5 سۋرەت تاڭداپ الىنىپ، ولار قالانىڭ ورتالىق كوشەلەرىندەگى باننەرلەرگە ءىلىندى.