قازاقستاندىق تەننيسشىلەر حالىقارالىق تۋرنيرلەردە ءساتتى ونەر كورسەتۋدە

تۇركيانىڭ ىستانبۇل قالاسىندا ءوتىپ جاتقان جارىستىڭ العاشقى اينالىمىندا دۇنيەجۇزىلىك رەيتينگتە 83-ورىندا تۇرعان يۋليا پۋتينتسيەۆا الەمنىڭ 34- راكەتكاسى، رۋمىنيالىق سورانا كىرستيامەن كەزدەستى. ەكى ساعاتتاي ۋاقىتقا سوزىلعان باسەكەدە قازاقستاندىق تەننيسشى 0:6، 6:1، 6:0 ەسەبىمەن جەڭىسكە جەتتى.

جۇلدە قورى 250 مىڭ ا ق ش دوللارىن قۇرايتىن جارىستىڭ شيرەك فينالىنا شىعۋ ءۇشىن يۋ. پۋتينتسيەۆا الەمنىڭ 122-راكەتكاسى، فرانسيالىق پولين پارمانتەمەن شەبەرلىك بايقاسادى.

سول سەكىلدى ەرلەر اراسىندا الەكساندر بۋبليك بۋداپەشت تۋرنيرىنىڭ (جۇلدە قورى - 618510 ا ق ش دوللارى) ەكىنشى اينالىمىنا شىقتى. دۇنيەجۇزىلىك رەيتينگتە 143- ورىندا تۇرعان ا. بۋبليك الەمنىڭ 87-راكەتكاسى، وزبەكستاندىق تاجىريبەلى تەننيسشى دەنيس يستوميندى تىزە بۇكتىردى. 2 ساعات 41 مينۋتقا سوزىلعان اسا تارتىستى كەزدەسۋدە الەكساندر 6:7 (6:8)، 7:6 (7:5)، 7:5 ەسەبىمەن باسىم ءتۇستى.

شيرەك فينالعا جولداما الۋ ءۇشىن ا. بۋبليك گەرمانيا ەلىنىڭ وكىلى، الەمنىڭ 61- راكەتكاسى يان-لەننارد شترۋففپەن تالاسادى.

ەسكە سالا كەتەيىك، شتۋتگارتتا نەگىزگى تۋرنيرگە وتكەن قازاقستاننىڭ ءبىرىنشى، الەمنىڭ 52- راكەتكاسى زارينا دياس دۇنيەجۇزىلىك رەيتينگتە 56-ساتىدا تۇرعان گەرمانيالىق كارينا ۆيتتەفتپەن كۇش سىناسادى. الەمنىڭ ءبىرىنشى راكەتكاسى، رۋمىنيالىق سيمونا حالەپ باستاعان مىقتىلار قاتىسىپ جاتقان بۇل جارىستىڭ جۇلدە قورى - 816 مىڭ ا ق ش دوللارى.